АҚШ президенти Дональд Трамп томонидан давлат бошқарувини соддалаштириш ва харажатларни қисқартириш мақсадида ташкил этилган DOGE департаменти расман бекор қилинди. Бу ҳақда Zamon.uz маълум қилди.
OPM раҳбари Скотт Купернинг таъкидлашича, департамент энди “марказлашган тузилма сифатида мавжуд эмас” ва унинг кўп вазифалари Ходимлар бошқармасига ўтказилган.
DOGE таркибида ишлаган бир қатор мутахассислар ҳозир Жо Геббия раҳбарлигидаги Миллий дизайн студиясида фаолият юритиб, ҳукумат сайтларини ривожлантириш устида ишламоқда.
Лойиҳа аввал миллиардлаб маблағларни тежашни ваъда қилган бўлса-да, мустақил экспертлар бу рақамларни тасдиқлаш имкони бўлмаганини айтган.
Трамп ва унинг ҳамкори сифатида кўриниш берган Илон Маск ҳам ташаббусни фаол тарғиб қилган эди. Маскнинг бир конференцияда бюрократияни “кесиш” рамзи сифатида занжирсимон арра кўтариб чиқиши эътиборли ҳолат сифатида тилга олинган.
DOGE ёпилганига қарамай, тузилмада ишлаган ходимларнинг кўпчилиги бошқа федерал идораларга ўтган. Республикачи партия раҳбарлигидаги айрим штатларда эса DOGEга ўхшаш локал моделлар ҳали ҳам йўлга қўйилаётгани қайд этилган.
