Украина президенти Владимир Зеленскийнинг сўзларига кўра, Россия нефть қазиб олиш ва қайта ишлаш ҳажмидаги пасайиш туфайли жорий йилда 37 миллиард доллардан ортиқ зарар кўради.
Зеленский ўз мурожаатида Украина Ташқи разведка хизмати раҳбари Олег Ивашченконинг ҳисоботига таяниб, Россияда нефть қазиб олиш ва қайта ишлаш ҳажми кескин камайганини билдирди.
Унинг айтишича, бу пасайиш нафақат иқтисодий, балки сиёсий оқибатларга ҳам олиб келмоқда.
“Разведка маълумотларига кўра, Россия нефть саноатидаги инқироз чуқурлашмоқда. Бу йилги зарар камида 37 миллиард долларга тенг бўлади”, — деди Зеленский.
У, шунингдек, Ғарб давлатлари томонидан жорий этилган санкциялар ҳам ўз самарасини кўрсатаётганини қайд этди.
Зеленский таъкидлашича, Россия иқтисодиётининг асосий таянчи бўлган энергия соҳасидаги босим ортиб бормоқда ва бу, охир-оқибат, Кремлнинг уруш олиб бориш имкониятларини чеклайди.
