Намангандаги воқеа — фақат бир педофилнинг разолати эмас, бу жиноятни йиллар давомида “ахлоқ тузатиш ишлари” деган юмшоқ ифода билан оқлаб келган тизимнинг юзи. Боланинг ҳаёти билан ўйнаш мумкин эмас. Бу фақат жиноят эмас — инсонийликка қарши қўзғолон.
Шундай педофиллар жазо муддатини “яхши хулқ” баҳонаси билан қисқартириб, кўчада эркин юргани — давлатнинг болага бўлган муносабатидан дарак. Қонун фақат қоғозда эмас, ҳаётда ҳам қаттиқ бўлиши керак. Бундай жиноятчилар учун кечириш, енгиллик ёки “яхши хулқ” деган гап бўлмаслиги шартлигининг яна бир исботига гувоҳ бўлдик.
Қонунчилигимизда 2024 йилда Жиноят кодексига ўзгартириш киритилган, унга кўра жазонинг ўталмаган қисмини енгилроғи билан алмаштириш 18 ёшга тўлмаган жабрланувчининг номусига текканлик ёки унга нисбатан зўрлик ишлатиб, жинсий эҳтиёжни ғайритабиий усулда қондирганлик учун қўлланмайди. Аммо бугун асраш учун қонунчиликни янада қатъий жазо чораларини қўллашимиз зарур деб ҳисоблайман.
Менинг талабим қатъий, болаларга нисбатан ҳар қандай жинсий зўравонлик учун умрбод озодликдан маҳрум қилиш жазоси қонун даражасида белгилашнинг вақти келди.
Бола — миллатнинг келажаги деган сўзни кўп айтамиз. Лекин ҳар бир бундай воқеа шу сўзни ёлғонга чиқараяпти. Агар биз ҳали ҳам шундай педофилларга енгил муносабатда бўлсак, демак, келажакни қўлимиз билан йўқ қилаяпмиз.
Дилноза Азизова
Олий Мажлис Қонунчилик палатаси депутати, "Миллий тикланиш" ДП фракцияси аъзоси
