Куни кеча ижтимоий тармоқларда Тошкент шаҳрининг Янгиҳаёт туманидаги кўп қаватли уйлардан бирида балкондан тушиб кетиши мумкин бўлган гўдакни бир йигитдан қутқариб қолгани акс этган видео тарқалганди.
Ҳолат юзасидан Тошкент шаҳар ИИББ расмий маълумот берди. Қайд этилишича, 4-қаватдан тушиб кетиши мумкин бўлган болакайни 5-қаватда яшовчи талаба йигит қутқариб қолган.
“Тахминан соат 11 ларда эди. Бирдан бақир-чақир овозлари эшитилди. Пастдаги қўшнимизнинг фарзандлари балкондан тушиб кетаётган экан. Ҳеч қандай ҳимоя воситаларисиз пастга тушишга тўғри келиб қолди. Пастга тушиб, болани қутқариб қолдик. Учта фарзандлари бор экан, учаласини ҳам олиб, ичкарига киритиб қўйдик”, дейди талаба йигит.
Воқеадан сўнг ҳолат юзасидан маҳалла профилактика инспектори болаларнинг онаси билан профилактик суҳбат ўтказган.
“Биз ҳам пастда маҳалладагилар билан хавфсизлик чораларини кўриб тургандик. Шу пайтда 5-қаватда яшовчи фуқаромиз жонбозлик кўрсатиб, 4-қаватга сакраб тушди ва боланинг жонини сақлаб қолди”, дейди профилактика инспектори Нодир Охунов.
