Ўзбекистонга олиб кирилаётган енгил ва юк автомобиллари учун экологик сертификат олиш талаби бекор қилинди. Бу ҳукуматнинг 597-сонли қарорида назарда тутилган.
Эндиликда автомобилнинг экологик талабларга мослиги умумий техник регламент асосида баҳоланади. Шу билан бирга, ҳар қандай транспорт воситаси камида “Евро-4” даражасидаги экологик стандартларга жавоб бериши лозим.
Ариза берувчилар экологик мосликни тасдиқловчи ҳужжатларни тақдим этиши керак бўлади, масалан: ишлаб чиқарувчидан олинган расмий хат ёки техник ҳужжатлар.
Электр двигателли машиналар (тўлиқ электр) экологик баҳолашдан озод этилади. Аммо бу имтиёз гибрид автомобилларга тааллуқли эмас.
Эслатиб ўтамиз, “Экологик транспорт” тизимини жорий этиш муддати 2026 йил 1 январга сурилган эди.
