Хитой Халқ Республикаси Раиси Си Цзиньпиннинг таклифига биноан, 30 августдан 3 сентябргача Ўзбекистон Республикаси Президенти Шавкат Мирзиёев ушбу мамлакатга расмий ташриф буюради.
31 август – 1 сентябрь кунлари Ўзбекистон раҳбари Тяньцзин шаҳрида бўлиб ўтадиган Шанхай ҳамкорлик ташкилотига аъзо давлатлар раҳбарлари кенгаши йиғилиши ва «ШҲТ плюс» форматидаги саммитда иштирок этади.
Тадбирлар кун тартибига кўп томонлама ҳамкорликни устувор йўналишларда кенгайтириш ва ташкилот фаолиятини янада такомиллаштиришга оид долзарб масалалар киритилган. Йиғилиш якунларига кўра Тяньцзин декларацияси, қўшма ҳужжатлар ва хавфсизлик, рақамли иқтисодиёт, “яшил” саноат, энергетика, туризм ва бошқа соҳаларда шерикликни ривожлантириш ва мустаҳкамлашга қаратилган қарорлар қабул қилиниши режалаштирилган.
2 сентябрь куни Пекин шаҳрида давлат раҳбари Хитой Халқ Республикаси Раиси Си Цзиньпин билан музокаралар олиб боради, шунингдек, расмий шахслар ва Хитойнинг етакчи компаниялари раҳбарлари билан учрашувлар ўтказади. Учрашувлар чоғида ҳар томонлама стратегик шерикликни чуқурлаштириш ва амалий ҳамкорликни кучайтириш масалалари муҳокама қилинади.
Ўзбекистон Президенти 3 сентябрь куни Иккинчи жаҳон урушидаги Ғалабанинг 80 йиллигига бағишланган тантанали тадбирларда иштирок этади.
