2024 йил февраль ойида 7,5 йил озодликдан маҳрум этиш жазосига ҳукм қилинган “Тошшаҳартрансхизмат” акциядорлик жамиятининг собиқ раҳбари Анвар Жўраев 2025 йил июнь ойида қамоқдан озод этилди.
Тошкент шаҳар суди апелляция инстанциясининг жиноят ишлари бўйича судлов ҳайъати 5 июнь куни чиқарган қарорга кўра, унга нисбатан озодликдан маҳрум қилиш жазоси озодликни чеклаш жазосига алмаштирилди. Яъни, Жўраев 4,5 йил давомида муайян чекловлар билан эркинликда яшаш ҳуқуқини олди.
Бундан ташқари, у 3 йил мобайнида “Тошшаҳартрансхизмат” тизимида моддий жавобгарлик ёки бошқарув вазифаларида ишлаш ҳуқуқидан маҳрум қилинди.
Эслатиб ўтамиз, Анвар Жўраевга нисбатан жуда кўп миқдорда талон-торож қилиш, солиқ тўлашдан бўйин товлаш, мансаб ваколатини суиистеъмол қилиш, мансаб сохтакорлиги ва жиноий даромадларни легаллаштириш каби айбловлар қўйилган эди.
Суд ҳукмида қайд этилишича, у давлатга катта миқдорда моддий зарар етказган. Шу билан бирга, озодликка чиқиши сабаблари ва суд қарорининг мотивацияси очиқланмаган.
