Тошкентда одамларни алдаб, чет элга ишлашга юборишни ваъда қилган фуқаро қўлга тушди. Бу ҳақда Иқтисодий жиноятларга қарши курашиш департаментининг ахборот хизмати маълум қилди.
Қайд этилишича , Пойтахт Тошкентнинг Юнусобод туманида истиқомат қилувчи “Ф.А.” МЧЖ раҳбари Ж.Б. ва менежери А.А. (муқаддам судланганлар) фуқароларни гўёки Германия давлатига ишга юбориши ҳақида интернет ижтимоий тармоқларига эълонлар жойлаштирган.
Сўнг ушбу эълон бўйича мурожаат қилган 9 нафар фуқаро билан сохта шартномалар тузиб, улардан жами 12 500 АҚШ доллари ва 73,2 млн сўм пулларни фирибгарлик йўли билан қўлга киритган.
Мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, аввалроқ Хоразм вилоятининг Хива шахрида фуқароларни Норвегияга ишга юборишни ваъда қилган шахс ушланган эди.
