Бухоро вилоятида сифати кафолатланмаган ва рухсатсиз тарзда муомалага киритилаётган юзлаб қутилар дори воситалари фош этилди. Бу ҳақда Давлат хавфсизлик хизмати Даракчи.узъга ахборот берди.
ДХХ ва Божхона қўмиталари ҳамкорлигида ўтказилган тезкор тадбир давомида Бухоро туманида яшовчи, 1985 йилда туғилган шахснинг уйида ва унга тегишли автомобилда тинтув ўтказилди. Натижада, “Имудон”, “Серебролизин”, “Дофамин”, “Маалокс” каби жами 78 турдаги 978 қути сифати кафолатланмаган ва ҳужжатсиз дори воситалари аниқланиб, процессуал тартибда расмийлаштирилди.
Суриштирув давомида дорилар билан боғлиқ ноқонуний фаолиятда Бухоро шаҳрида яшовчи, 1962 йилда туғилган шахс ҳам иштирок этгани фош бўлди. У жиноятга шерик сифатида гумон қилинмоқда.
“Фармацевтика маҳсулотлари хавфсизлиги маркази”нинг эксперт хулосасига кўра, ушбу дориларнинг:
— 32 тури Ўзбекистонда умуман рўйхатдан ўтмаган,
— 57 турида мувофиқлик сертификатлари йўқ,
— 6 тури сифатсиз деб топилган,
— 4 тури эса тўлиқ қалбакилаштирилган.
Энг хавфлиси — дорилар белгиланган сақлаш шароитларига зид тарзда сақланган. Бу эса уларни сотиш, сақлаш ва амалиётда қўллашни мутлақо тақиқлайди.
Мазкур ҳолат юзасидан фуқароларга нисбатан Жиноят кодексининг 25, 186³-моддаси 2-қисми “б” банди билан жиноят иши қўзғатилди, ҳозирда тергов ҳаракатлари олиб борилмоқда.
Расмийларга кўра, ушбу дори воситалари вақтида тўхтатилмаганида, улар Бухоро шаҳри ҳамда Шофиркон, Пешку ва Ромитан туманларидаги дорихоналар орқали истеъмолчиларга етиб бориши мумкин эди.
