Ўзбекистонда 2025 йилнинг январь–май ойларида 14 та овқатдан заҳарланиш ҳолати қайд этилди. Уларда 42 нафар фуқаро жабрланган. Бу ҳақда Ахборот ва оммавий коммуникациялар агентлигида бўлиб ўтган матбуот анжуманида маълум қилинди.
Маълумотга кўра, заҳарланиш ҳолатларининг катта қисми уй шароитида тайёрланган консервалар орқали рўй берган. Хусусан, 10 та ҳолатда ботулизм аниқланган бўлиб, жабрланганларнинг 8 нафарини болалар ташкил этган.
Шунингдек, учта ҳолатда овқат “токсикинфексияси” қайд этилган. Натижада 13 нафар фуқаро шифокор ёрдамига муҳтож бўлган. Улар орасида ҳам 8 нафар бола бор. Бир ҳолатда эса кимёвий модда билан заҳарланиш кузатилган.
Тақдим этилган рақамлар овқат хавфсизлиги борасида жиддий муаммолар борлигини кўрсатади. Чунки 2024 йилда мамлакат бўйлаб текширилган 20 184 та умумий овқатланиш муассасаларининг 7,5 фоизида қонунбузарликлар аниқланган. Улардан 3,3 фоизи санитария ва гигиена меъёрларини қўпол равишда бузган.
Жаҳон соғлиқни сақлаш ташкилоти маълумотларига кўра, ҳар йили дунёда 600 миллионга яқин инсон сифатсиз овқат сабаб касалланади. Бу эса шунчаки рақам эмас — бу огоҳлантирувчи факт.
Эслатиб ўтамиз, 2024 йилнинг биринчи чорагида Ўзбекистонда 18 та овқатдан заҳарланиш ҳолати қайд этилган. Уларда 143 нафар фуқаро жабрланган.
Мутасаддиларнинг таъкидлашича, эҳтиёт чораларига амал қилиш, айниқса, уй шароитида тайёрланган маҳсулотларни истеъмол қилишда қаттиқ назорат муҳим. Акс ҳолда, оддий овқат оғир оқибатларга сабаб бўлиши мумкин.
