Ушбу саволга Республика перинатал маркази директори Нилуфар Ўринбоева батафсил жавоб берди.
— Бугун кўпчилик аёллар ҳомиладор бўлганидан бир неча ой ўтиб, TORCH-инфекциясига таҳлил топширади. Бироқ бу хато, — дейди мутахассис. — Аслида ҳомиладорликдан 2-3 ой аввал, яъни уни режалаштириш пайтида текширувдан ўтиш, агар натижа мусбат бўлса, вирусга қарши зарур дори-дармонларни қабул қилиш мақсадга мувофиқ.
Ана шунда аёл организми вирусни вақтида енга олади ва танада мазкур инфекцияларга қарши антитаначалар ҳосил бўлади. Шунингдек, бу – ҳомиладорликкача даво ва профилактика чораларини кўриш имконини беради.
Шифокор тавсиясига кўра, TORCH-инфекцияни ҳомиладорлик даврида ҳам текширтириб бориш зарур.
Бу вируслар гуруҳининг ўзига хослиги шундаки, унинг аломатлари мутлақо кузатилмаслиги ёки кам намоён бўлиши мумкин. Жумладан, тошма, иситма каби клиник белгилар орқали ташхис қўйиш бироз мураккаб. Шу боис энг аниқ диагностик усул қонда иммуноглобулинларни текширишдир.
Бунинг учун оч қоринга қон таҳлили топширилади. Текширувгача бўлган 3 ҳафта давомида антибактериал ва вирусга қарши препаратлар қабул қилмаслик лозим.
Таҳлил натижалари маълум бўлгач, албатта, даволовчи шифокор билан маслаҳатлашиш керак.
