АҚШ президенти Доналд Трамп мамлакатнинг турли шаҳарларидаги йирик норозилик намойишларига қарамасдан, ноқонуний муҳожирларни ҳибсга олиш ва депортация қилиш чораларини кучайтиришга кўрсатма берди.
Бу ҳақда у ижтимоий тармоғидаги саҳифасида маълум қилар экан, хусусан, Лос-Анжелесда маҳаллий расмийларнинг миграция сиёсатига қарши уюштирилган намойишларга муносабат билдирди.
Президентнинг сўзларига кўра, АҚШ Иммиграция ва божхона хизмати (ICE) “ноқонуний муҳожирларга қарши тарихдаги энг йирик оммавий депортация операцияси”ни бошлаган. “Бизни бурчимизни бажаришимизга ҳеч нарса тўсқинлик қила олмайди”, — деди Трамп.
У, шунингдек, ICEга “тарихдаги энг катта оммавий депортация дастури”ни амалга ошириш учун барча зарур чораларни кўришни буюрганини таъкидлади.
Трамп Лос-Анжелес, Чикаго ва Нью-Йорк каби шаҳарларда депортация ишларини фаоллаштиришга чақирди. У маҳаллий демократик амалдорларни сайловчилар фаоллигини ошириш мақсадида ноқонуний муҳожирлардан фойдаланишда ва “Америка фуқароларидан иш ўринлари ва имкониятларни тортиб олишда” айблади.
Президентга кўра, федерал ҳукумат ноқонуний муҳожирларни ўз ватанларига қайтариш жараёнини давом эттиради. Бу борада ICE, Давлат департаменти ва Мудофаа департаменти каби идораларга зарур топшириқлар берилган.
Лос-Анжелесда норозилик намойишлари
ICE томонидан амалга оширилаётган чораларга жавобан Лос-Анжелесда оммавий норозилик намойишлари бўлиб ўтди. Намойишчиларнинг бир қисми ҳибсга олинди. Шаҳарнинг айрим ҳудудларида намойишчилар ва полиция ўртасида тўқнашувлар қайд этилди.
Трамп вазиятни барқарорлаштириш мақсадида Лос-Анжелесга Миллий гвардия жўнатилганини маълум қилди ва юзага келган ҳолатда демократлар етакчиларини айблади.
АҚШ Мудофаа вазирлиги маълум қилишича, президентнинг буйруғига асосан, Миллий гвардиянинг 4000 нафар аскари жойлаштиришга тайёргарлик кўрмоқда. Қўшимча равишда, хавфсизлик чоралари доирасида 700 нафар денгиз пиёда қўшинлари ҳам шаҳарга юборилади.
