Украина Президенти Владимир Зеленский Ўзбекистон, Эрон ва Хитой компанияларига қарши санкциялар киритди. “Қора рўйхат” Украина давлат раҳбарининг №301/2025 фармони билан тасдиқланди.
Маълумотларга кўра, жами 58 нафар жисмоний ва 74 нафар юридик шахсга нисбатан жазо чоралари қўлланилган, улардан 67 нафари ҳарбий технологияларга тегишли. Бундан ташқари, ҳужжатда Ўзбекистоннинг учта, Эроннинг ва Хитойнинг биттадан компанияси номи тилга олинган.
Ўзбекистондаги қуйидаги корхоналар “қора рўйхат”га тушган:
“Фарғона кимё заводи” МЧЖ (Фарғона)
“Raw materials cellulose” МЧЖ (Жиззах)
“Mercury Renaissance” МЧЖ ҚК (Тошкент)
Шунингдек, ўзбекистонлик Рустам Мўминов ҳам Украина санкциялари остида қолган.
Санкцияларнинг асосий чекловларига қуйидагилар киради:
савдо операцияларини тўлиқ тугатиш;
ресурслар транзити, рейслар ва Украина ҳудуди орқали ташишни чеклаш ёки тўлиқ тўхтатиш;
капитални чет элга олиб чиқишни тақиқлаш;
иқтисодий ва молиявий мажбуриятларни тўхтатиб туриш;
технологиялар ва интеллектуал мулк ҳуқуқларини узатишни тақиқлаш;
Украинага кириш визаларини бекор қилиш ва бошқа чекловлар.
