АҚШ Конгрессининг Демократлар партиясидан бўлган вакили Шри Танедар (Мичиган штати) душанба куни собиқ президент Дональд Трампка қарши импичмент бўйича еттита моддадан иборат таклифни тақдим этди.
Бу 2025 йилда Трамп ёки унинг маъмурияти аъзоларига қарши илк импичмент уриниши ҳисобланади. Танедар ўз баёнотида Трампни “Конституция ва демократиямизга очиқ ва ҳозирги таҳдид солувчи, президентликка ноқобил шахс” деб атади.
У тақдим этган импичмент моддалари адолатга тўсиқ қўйиш, ҳокимиятни суистеъмол қилиш, ваколатни ноқонуний ўзлаштириш, пора олиш ва коррупция каби айбловларни ўз ичига олади.
Айбловлар асосан Трампнинг шахсий бойликлари ва ҳокимиятни марказлаштиришга оид ҳаракатлари билан боғлиқ.
Шу билан бирга, импичмент таклифи амалга ошиши эҳтимоли жуда паст, чунки Ҳар икки палатада ҳам Республикачи партия назоратни қўлида ушлаб турибди. Танедар назарий жиҳатдан импичмент бўйича овоз беришни талаб қилиш ҳуқуқига эга, аммо ҳозирча бундай ниятни билдиргани йўқ.
Намояндачилар палатасидаги Демократлар етакчиси Хаким Жеффрис бу таклифни ҳали кўриб чиқмаганини айтди. Оқ уй эса ҳозирча расмий изоҳ бермади.
Трампга қўйилган айбловлар орасида Килмар Абрего Гарсияни депортация қилиш ҳам бор. Конгрессменнинг сўзларига кўра, бу шахс ноқонуний равишда Салвадорга жўнатилган. Танедар, шунингдек, Конгресс рухсатисиз Илон Маск бошчилигида Ҳукумат самарадорлиги департаменти (DOGE) ташкил этилгани ва у орқали айрим ҳукумат идораларининг молиялаштирилиши қисқартирилганини ҳам танқид қилди.
Импечментга яна бир сабаб сифатида Трампнинг савдо тарифлари сиёсати келтирилган. Конгрессменнинг фикрича, бу халқаро иқтисодиётга салбий таъсир кўрсатган.
Абдуллоҳ Саййид
