Мальдив ҳукумати Ғазодаги урушга қарши норозилик сифатида Исроил фуқароларига мамлакатга киришни тақиқловчи қонун қабул қилди. Бу ташаббус илк бор ўтган йили кўтарилган эди, аммо энди Президент томонидан расман маъқулланди.
Президент Муҳаммад Муиззунинг девони ўз баёнотида Мальдив давлати Исроилнинг Ҳамасга қарши Ғазода олиб бораётган урушига жавоб тариқасида исроилликларнинг мамлакатга киришини тақиқлашга қарор қилганини маълум қилди.
Бу қарор, баёнотда таъкидланишича, фаластинлик халқ билан қатъий ҳамдардликни ифода этади.
Исроил фуқароларини Мальдивга киритишни тақиқлаш ҳақидаги дастлабки қарор 2024 йил июнь ойида қабул қилинган эди.
Сешанба куни мамлакат парламенти — Халқ Мажлиси — Мальдив Иммиграция Қонунига ўзгартиш киритиб, Исроил паспортига эга шахсларнинг мамлакатга киришини тақиқлади. Президент Муиззу ушбу ўзгаришни зудлик билан маъқуллади.
Президент идораси баёнотида шундай дейилган: “Бу тасдиқлаш ҳукуматнинг Исроил томонидан фаластинликларга қарши амалга оширилаётган зўравонлик ва геноцид актларига қарши қатъий позициясини акс эттиради.”
Президент идораси ҳозирча мазкур тақиқ қачондан кучга киришини маълум қилмади.
Қайд этиш жоиз, Мальдив ва Исроил ўртасида тўлиқ дипломатик алоқалар мавжуд эмас, аммо шу пайтгача исроилликлар сайёҳ сифатида ушбу орол мамлакатга ташриф буюришлари мумкин эди. Мальдив ўзининг тиниқ сувлари ва қимматбаҳо курортлари билан машҳур.
1990-йилларда Исроил сайёҳларига қўйилган тақиқ бекор қилинган, ҳатто 2010 йилда икки давлат ўртасида муносабатларни тиклаш ҳаракатлари ҳам бўлган.
2023 йилда Исроил Ташқи ишлар вазирлиги ўз фуқароларига Мальдивга сафар қилмаслик бўйича огоҳлантирув эълон қилган эди.
Расмий маълумотларга кўра, 2025 йил февраль ойида Мальдивга ташриф буюрган 214 минг хорижий сайёҳ орасида фақат 59 нафари исроиллик бўлган.
ТТаъкидлаш керак, мусулмонлар кўпчиликни ташкил этувчи яна бир Жанубий Осиё мамлакати — Бангладеш ҳам ўтган ҳафта ўз фуқароларига Исроилга сафар қилишни тақиқлади. Шу билан бирга, мамлакат паспортларида қайтадан “Исроил - мустасно” (яъни, Исроилдан бошқа давлатларга чиқишга рухсат этилади) деган ёзув тикланди.
Шунингдек, Ироқ, Ливан, Покистон ва Сурия каби давлатлар ҳам Исроил фуқароларини мамлакатга киритишни тақиқлайди ёки ўз фуқароларига Исроилга сафар қилишни ман этади.
Абдуллоҳ Саййид
