Moskva viloyati prokuraturasi matbuot xizmatidan xabar berilishicha, Podmoskovedagi Ivanteevkadagi maktablardan birida to`qqizinchi sinf o`quvchisi otishma uyushtirdi.
Ma`lumotlarga ko`ra, bugun 5 sentyabr kuni 15 yoshli 9-sinf o`quvchisi informatika darsi vaqtida o`qituvchisining boshiga bolta bilan zarba bergan. Keyin esa o`smir qo`lbola uskunalarni portlatib, o`q uza boshlagan.
Prokuratura bergan ma`lumotlarga ko`ra, yuzaga kelgan hodisada bir nechta bola jabrlangan, ularning barchasi kasalxonaga etkazilgan. O`quvchi esa polisiya bo`limiga so`roqqa olib ketilgan.
Ayni damda viloyat prokurori Aleksey Zaxarov ta`lim muassasasiga mas`ul shaxslarning harakatlariga qonuniy baho bermoqda.
Tergov ishlari prokuratura tomonidan nazoratga olingan.
