Prezident tashrif avvalida buyuk muhaddis Imom Buxoriy maqbarasini ziyorat qilib, Qur’on tilovati va duo o‘qildi.
So‘nggi yillarda majmua keng ko‘lamda qayta bunyod etilib, ziyoratchilar uchun barcha qulayliklar yaratilgani ta’kidlandi. Bugungi kunda majmua kuniga 65 ming nafargacha mehmonni qabul qilish imkoniyatiga ega.
Davlat rahbari ziyoratchilar uchun avtoturargohlarni kengaytirish, sayr hududlarini obodonlashtirish, dam olish maskanlarini ko‘paytirish hamda sharoitlarni doimiy tahlil qilib borish bo‘yicha ko‘rsatmalar berdi. Shuningdek, mamlakat bo‘ylab imom-xatiblarni majmuaga jalb etib, malakasini oshirish muhimligi qayd etildi.
