Shavkat Mirziyoyev Ostona shahridagi "EXPO" xalqaro ko‘rgazmalar markazida tashkil etilgan Mintaqaviy ekologik sammit ko‘rgazmasi doirasida milliy pavilyonlar faoliyati bilan tanishdi.
Tashrif davomida Markaziy Osiyo davlatlari bilan bir qatorda Mo‘g‘uliston, Ozarbayjon, Gruziya va Armaniston delegatsiyalari ham o‘z ekspozitsiyalari bilan ishtirok etmoqda. Sammit doirasida ekologik siyosatning 8 ta ustuvor yo‘nalishi, jumladan iqlim o‘zgarishi, havo sifatini yaxshilash, chiqindilarni boshqarish hamda "yashil" iqtisodiyotni rivojlantirish masalalariga alohida e‘tibor qaratilmoqda.
O‘zbekiston pavilyonida mamlakatning ekologik siyosat sohasidagi islohotlari, "Yashil makon", "Toza havo", "Chiqindisiz hudud" kabi umummilliy loyihalar hamda Orolbo‘yi hududini tiklash bo‘yicha amalga oshirilayotgan ishlar namoyish etilmoqda.
Shuningdek, ekspozitsiya orqali O‘zbekistonning xalqaro hamkorlikni, xususan BMT tuzilmalari bilan ekologik yo‘nalishdagi aloqalarni kengaytirishga qo‘shayotgan hissasi ham aks ettirilgan.
