Favqulodda vaziyatlarda aholini tezkor xabardor qilish maqsadida O‘zbekistonda masjidlar tashqi ovoz kuchaytirgichlari bilan jihozlandi. Loyihani BMT Taraqqiyot dasturi va Favqulodda vaziyatlar vazirligi hamkorligida amalga oshirildi.
Hozirgacha Jizzax, Qashqadaryo, Namangan, Samarqand, Sirdaryo, Toshkent va Farg‘ona viloyatlaridagi masjidlar tizimga ulandi. Natijada 6,5 millionga yaqin aholi favqulodda xabarlardan tezkor xabardor bo‘la oladi.
Masjidlarning tanlanishi tasodifiy emas — ular aholi punktlarida keng qamrovni ta’minlaydi. Ovoz kuchaytirgichlar 500 metrdan 2000 metrgacha eshitilishni kafolatlaydi. Tizim mobil aloqa yoki elektr ta’minoti uzilganda ham ishlash imkoniyatiga ega, bu esa ishonchli axborot manbai sifatida xizmat qiladi.
Loyihaning qo‘shimcha qismi sifatida asosiy yo‘llar va gavjum joylarga 28 ta tashqi ekran o‘rnatilib, favqulodda xabarlarni yetkazishda qo‘shimcha kanal sifatida ishlatiladi. Tizim ayniqsa keksa yoshdagilar, bolalar va imkoniyati cheklangan shaxslar uchun muhim ahamiyat kasb etadi.
