Bojxona qoʻmitasining Toshkent va Andijon viloyatlari boshqarmalari, Davlat xavfsizlik xizmati hamda ichki ishlar organlari xodimlaridan iborat maxsus tezkor guruhi tomonidan sintetik giyohvandlik vositalari tayyorlab kelinayotgan yirik narkolaboratoriya faoliyatiga chek qoʻyildi.
Maʼlum qilinishicha, dastlab Toshkent viloyatining Zangiota tumanida kuzatuvga olingan shaxs toʻxtatilib, tekshirilganda uning yonidan 0,13 gramm "gashish" topilgan. Shundan soʻng oʻtkazilgan tezkor tadbirlar davomida Toshkent katta halqa yoʻlining Zangiota tumanidan oʻtuvchi qismidagi yoʻl chetida joylashgan omborda 5 dona idishda saqlanayotgan 900 litr prekursor aniqlandi.
Tezkor surishtiruvlar Andijon viloyatiga olib borgan. Yashirin kuzatuvga olingan yana ikki nafar shaxs turli manzillarga koʻmib qoʻyilgan 100 litr suyuq va 25 kg kukun koʻrinishidagi prekursorlarni olib, Andijon shahrining Bogʻishamol mahallasidagi dala hovliga olib kirgani aniqlandi.
Mazkur manzilda xolislar ishtirokida oʻtkazilgan koʻzdan kechirish jarayonida yashirin narkolaboratoriya fosh etildi. Dala hovlidan jami 26 kg ogʻirlikdagi "mefedron", shuningdek 590 litr turli kimyoviy suyuqlik va prekursorlar hamda maxsus anjomlar ashyoviy dalil sifatida olib qoʻyilgan.
Dastlabki maʼlumotlarga koʻra, gumonlanuvchilar dala hovlini 15 ming 800 AQSH dollariga sotib olib, ijtimoiy tarmoqlardagi "Saymon" laqabli shaxs koʻmagida noqonuniy faoliyatni yoʻlga qoʻygan.
Holat yuzasidan bojxona organlari tomonidan tezkor-qidiruv harakatlari davom ettirilmokda. Qayd etilishicha, yil boshidan buyon respublika boʻylab 200 kgdan ortiq giyohvandlik vositalari hamda 27 kg psixotrop va kuchli taʼsir qiluvchi moddalar noqonuniy aylanmadan chiqarilgan.
