Shavkat Mirziyoyev imzolagan hujjatga ko‘ra, bayram tadbirlari “Yagona Vatan, yagona xalq bo‘lib, yangi hayot va kelajak yaratamiz!” bosh g‘oyasi asosida tashkil etiladi. Tayyorgarlik va o‘tkazish ishlarini muvofiqlashtirish uchun respublika komissiyasi tuzilib, unga Abdulla Aripov rahbarlik qiladi.
Qarorga muvofiq, aprel–sentabr oylari davomida respublika bo‘ylab “Mustaqillik to‘yi” festivali, ma’naviy-ma’rifiy tadbirlar va ijtimoiy loyihalar o‘tkaziladi. Shuningdek, Toshkentdagi asosiy bayram dasturiga tanigli ijodkorlar jalb etiladi, yangi sanoat, ta’lim, madaniyat va sport obyektlari ochilishi rejalashtirilgan.
Bundan tashqari, “Vatan fidoyilari” ramziy monumenti eskizi ishlab chiqiladi, “Mustaqillik zafarnomasi” kitob-albomi tayyorlanadi, xalqaro konferensiya va diaspora vakillari ishtirokida madaniy tadbirlar tashkil etiladi. Markaziy bank esa mustaqillikning 35 yilligiga bag‘ishlangan esdalik oltin tangasini zarb etadi.
