Шавкат Мирзиёев имзолаган ҳужжатга кўра, байрам тадбирлари “Ягона Ватан, ягона халқ бўлиб, янги ҳаёт ва келажак яратамиз!” бош ғояси асосида ташкил этилади. Тайёргарлик ва ўтказиш ишларини мувофиқлаштириш учун республика комиссияси тузилиб, унга Абдулла Арипов раҳбарлик қилади.
Қарорга мувофиқ, апрель–сентябрь ойлари давомида республика бўйлаб “Мустақиллик тўйи” фестивали, маънавий-маърифий тадбирлар ва ижтимоий лойиҳалар ўтказилади. Шунингдек, Тошкентдаги асосий байрам дастурига таниқли ижодкорлар жалб этилади, янги саноат, таълим, маданият ва спорт объектлари очилиши режалаштирилган.
Бундан ташқари, “Ватан фидойилари” рамзий монументи эскизи ишлаб чиқилади, “Мустақиллик зафарномаси” китоб-альбоми тайёрланади, халқаро конференция ва диаспора вакиллари иштирокида маданий тадбирлар ташкил этилади. Марказий банк эса мустақилликнинг 35 йиллигига бағишланган эсдалик олтин тангасини зарб этади.
