Buxoro viloyati Qorako‘l tumanida 31 yanvar kuni ikki qavatli uyda gaz-havo aralashmasining portlashi sodir bo‘ldi. Bu haqda Favqulodda vaziyatlar vazirligi axborot xizmati xabar berdi.
Qayd etilishicha, soat 08:23 da 112 tizimi orqali Qorako‘l tumani “Tinchlik” mahalla fuqarolar yig‘iniga qarashli Sho‘robod ko‘chasida joylashgan ikki qavatli turar joy xonalaridan birida gaz-havo aralashmasining portlashi yuz bergani to‘g‘risida xabar kelib tushgan.
Hodisa joyiga FVV qutqaruvchilari hamda boshqa tegishli xizmatlar yetib borgan. Ayni paytda portlash oqibatlarini bartaraf etish ishlari olib borilmoqda.
Dastlabki ma’lumotlarga ko‘ra, plitaga ulangan gazdan foydalanish jarayonida sizib chiqqan gaz natijasida portlash sodir bo‘lgani taxmin qilinmoqda.
Hodisa oqibatida 2 nafar fuqaro tan jarohati olgan va shifoxonaga yuborilgan. Halok bo‘lganlar yo‘q.
