Ma'lum qilinishicha, Denov tumanida yashovchi va sportning turli yo‘nalishlari bilan shug‘ullanib kelgan 6 nafar shaxs jamoat tartibini buzish va bezorilik bilan bog‘liq noqonuniy harakatlarga aloqador bo‘lgan. Ular Telegram orqali birlashib, o‘zlarini “Alfa” jinoyiy guruhi sifatida tanitgan.
Tergov ma'lumotlariga ko‘ra, joriy yilning 6 yanvar kuni soat 20:50 larda ushbu guruh a’zolari Skoda va Kia avtomashinalari ishtirokida sodir bo‘lgan yo‘l-transport hodisasidan so‘ng Denov tumani tez tibbiy yordam bo‘limiga borgan. U yerda ular Kia avtomashinasini boshqargan shaxsga nisbatan jismoniy bosim o‘tkazish maqsadida janjal ko‘targan.
Shifoxona ma'muriyati tomonidan tartibni saqlash bo‘yicha ogohlantirishlarga qaramay, guruh a’zolari faol qarshilik ko‘rsatgan, bemorlar va tibbiyot xodimlarining tinchligini buzgan hamda shifokor va jabrlanuvchiga tan jarohati yetkazgan.
Gumonlanuvchilar — guruh yetakchisi Sunnatullo Xolmuradov (1998 y.t.), shuningdek Elbek Karimov, Bahriddin Jumayev, Azamat Davlatov va Javohir Jo‘rayev ushlanib, ularga nisbatan “qamoq” ehtiyot chorasi qo‘llanilgan.
Hozirda mazkur holat yuzasidan O‘zbekiston Respublikasi Jinoyat kodeksining 277-moddasi 3-qismi “g” bandi bilan jinoyat ishi qo‘zg‘atilib, dastlabki tergov harakatlari olib borilmogda.
Ichki ishlar organlari ushbu guruh faoliyatidan jabr ko‘rgan fuqarolarni 102 qisqa raqami orqali murojaat qilishga chaqirdi.
