Shavkat Mirziyoyev O‘zbekiston Respublikasi Qurolli Kuchlari tashkil etilganining 34 yilligi va Vatan himoyachilari kuni munosabati bilan askar va serjantlar, ofitser va generallar, shuningdek, Qurolli Kuchlar faxriylarini bayram bilan muborakbod etdi.
Prezident tabrigida Vatan himoyasi kabi sharafli va mas’uliyatli burchni sidqi-dildan ado etib kelayotgan harbiylarga yuqash hurmat va ehtirom izhor etildi. Davlat rahbari mamlakat mustaqilligi, tinchligi va hududiy yaxlitligini ta’minlashda xizmat qilayotgan harbiylarni ona yurtning ishonchli posbonlari sifatida e’tirof etdi.
Murojaatda xizmat burchini bajarish chog‘ida halok bo‘lgan harbiylar xotirasi chuqur ehtirom bilan yodga olinib, ularning jasorati Vatan tarixida abadiy qolishi ta’kidlandi.
Shuningdek, Yangi O‘zbekistonni barpo etish jarayonida Qurolli Kuchlarning o‘rni muhim ekani, mudofaa sohasida amalga oshirilayotgan islohotlar milliy armiya jangovar salohiyatini oshirishga qaratilgani qayd etildi. "O‘zbekiston — 2030" strategiyasi doirasida harbiy qudratni mustahkamlash, boshqaruv va ta’minot tizimlarini takomillashtirish ishlari davom ettirilayotgani aytildi.
Har bir harbiy xizmatchi xalq bilan armiya — bir tan-u bir jon ekanini, uning ortida 38 millionlik xalq to‘g‘dek tayanch bo‘lib turganini doimo his etishi kerak, — deyiladi tabrikda.
Prezident harbiy xizmatchilar bundan buyon ham Vatan oldidagi muqaddas burchini sharaf bilan ado etishiga ishonch bildirdi.
