Uzbekistan Airways aviakompaniyasining Urganchga parvoz qilgan ikki yo‘lovchi reysi ob-havo sharoitining keskin yomonlashuvi tufayli Buxoro xalqaro aeroportiga qo‘nishga majbur bo‘ldi.
Xususan, Moskva (Vnukovo) — Urganch yo‘nalishidagi HY9616 hamda Sankt-Peterburg — Urganch reysi HY9638 ekipajlari parvoz xavfsizligini ta’minlash maqsadida muqobil qo‘nish maskani sifatida Buxoroni tanlagan.
Qayd etilishicha, Urganch xalqaro aeroportida tuman kuchayib, ko‘rinish masofasi 100 metrgacha pasaygan. Ayni paytda yo‘lovchilarga keyingi parvozlar bo‘yicha zarur xizmatlar ko‘rsatilayotgani ma’lum qilindi.
