Abdurrahmon Baxtiyev 29 dekabr kuni Toshkent shahar hokimining transport va yo‘l infratuzilmasi masalalari bo‘yicha o‘rinbosari etib tayinlandi. Bu haqda hokimlik matbuot xizmati xabar berdi.
Abdurrahmon Baxtiyev 1984 yilda tug‘ilgan. U 2007 yilda Toshkent davlat yuridik institutini, 2012 yilda esa Jahon iqtisodiyoti va diplomatiya universitetini tamomlagan. Tayinlovgacha, 2019 yildan buyon Prezident administratsiyasida mas’ul xodim lavozimida faoliyat yuritib kelgan.
Poytaxt hokimligi tarkibiy tuzilmasiga mazkur lavozimni kiritish Prezidentning 2025 yil 4 dekabrdagi “Toshkent shahrida transport tizimi boshqaruvini takomillashtirish hamda tirbandliklarning oldini olishga qaratilgan qo‘shimcha chora-tadbirlar to‘g‘risida”gi qarorida belgilangan.
Shuningdek, boshqaruv xodimlarining umumiy cheklangan soni 5 shtat birligidan iborat bo‘lgan Transport tizimini samarali tashkil etishni ta’minlash kotibiyatini shakllantirish ham topshirilgan.
Eslatib o‘tamiz, 17 dekabr kuni Elbek Shukurov boshqa ishga o‘tayotgani munosabati bilan Toshkentning Sergeli tumani hokimi lavozimidan ozod etilgan, uning o‘rniga Davron Ismatov tayinlangan edi.
