Абдураҳмон Бахтиёв 29 декабрь куни Тошкент шаҳар ҳокимининг транспорт ва йўл инфратузилмаси масалалари бўйича ўринбосари этиб тайинланди. Бу ҳақда ҳокимлик матбуот хизмати хабар берди.
Абдураҳмон Бахтиёв 1984 йилда туғилган. У 2007 йилда Тошкент давлат юридик институтини, 2012 йилда эса Жаҳон иқтисодиёти ва дипломатия университетини тамомлаган. Тайинловга қадар, 2019 йилдан буён Президент администрациясида масъул ходим лавозимида фаолият юритиб келган.
Пойтахт ҳокимлиги таркибий тузилмасига мазкур лавозимни киритиш Президентнинг 2025 йил 4 декабрдаги “Тошкент шаҳрида транспорт тизими бошқарувини такомиллаштириш ҳамда тирбандликларнинг олдини олишга қаратилган қўшимча чора-тадбирлар тўғрисида”ги қарорида белгиланган.
Шунингдек, бошқарув ходимларининг умумий чекланган сони 5 штат бирлигидан иборат бўлган Транспорт тизимини самарали ташкил этишни таъминлаш котибиятини шакллантириш ҳам топширилган.
Эслатиб ўтамиз, 17 декабрь куни Элбек Шукуров бошқа ишга ўтаётгани муносабати билан Тошкентнинг Сергели тумани ҳокими лавозимидан озод этилган, унинг ўрнига Даврон Исматов тайинланган эди.
