Sanksiyalar Ukrainani beqarorlashtirishda yoki Ukraina hududiy yaxlitligi, suvereniteti yoki mustaqilligiga putur yetkazish yoki tahdid solishda ishtirok etgan yoki ishtirok etayotgan, shuningdek, Rossiya hukumat faoliyatidan foyda olayotgan yoki uni qo‘llab-quvvatlayotgan shaxslarga nisbatan qo‘llaniladi.
Unga 24 nafar jismoniy va yuridik shaxs, shu jumladan, to‘rtta kompaniya va o‘zbekistonlik tadbirkor kiritilgan.
Xususan, 71 yoshli toshkentlik Mo‘minov Rustam Rahimjonovich O‘zbekiston, Rossiya va Isroil fuqaroligiga ega. Hujjatda aytilishicha, u moliyaviy xizmatlar ko‘rsatish yoki bunday harakatlarga yordam berishi mumkin bo‘lgan pul mablag‘lari, iqtisodiy resurslar, tovarlar yoki texnologiyalarni taqdim etish orqali Ukrainani beqarorlashtirishda yoki Ukrainaning hududiy yaxlitligi, suvereniteti yoki mustaqilligiga putur yetkazish yoki tahdid solishda ishtirok etayotgan yoki ishtirok etgan.
Shuningdek, ro‘yxatga quyidagilar ham kiritilgan:
Farg‘ona kimyo zavodi;
"Chemistry International" MChJ QK (Navoiy);
"Raw Materials Cellulose" MChJ (Jizzax);
"Gelion Business Trade" MChJ (Toshkent).
Asos sifatida kompaniyalar tovar yoki texnologiyalarni taqdim etish orqali Ukrainani beqarorlashtirishda yoki uning hududiy yaxlitligi, suvereniteti yoki mustaqilligiga putur yetkazish yoki tahdid solishda ishtirok etayotganligi yoki ishtirok etganligi ko‘rsatilgan.
Nizom moliyaviy sanksiyalar, jumladan, aktivlarni muzlatish, shuningdek, trast xizmatlarini ko‘rsatishni taqiqlashni nazarda tutadi.
