TASS xabariga ko‘ra, rossiyalik blogger Huseyn G‘asanov yangi jinoyat ishi ochilgani sababli yana qidiruvga berilgan. Nashr manbasining ma’lum qilishicha, "G‘asanovning qayta qidiruvga berilishiga yangi ish sabab bo‘lgan", biroq tafsilotlar hozircha oshkor qilinmagan.
Rossiya Ichki ishlar vazirligining qidiruv bazasida G‘asanov haqiqatan ham "qayta e’lon qilingan qidiruvdagi shaxs" sifatida qayd etilgan.
Eslatib o‘tamiz, Moskvaning Chertanovskiy sudi 2024 yil 14 may kunida G‘asanovni jinoyatdan olingan daromadlarni legalashtirish ishi doirasida sirtdan hibsga olish to‘g‘risida qaror chiqargan edi.
Unga Rossiya Jinoyat kodeksining 174-moddasi 4-qismi (jinoyatdan olingan daromadlarni legalashtirish) bo‘yicha ayblov qo‘yilgan bo‘lib, bu modda 7 yilgacha ozodlikdan mahrum etish jazosini nazarda tutadi.
