Navoiy viloyatida kichik xatolik sabab ikki dona qalampirning narxi 2 milliard so‘mga aylanib ketdi. Bu haqda Adliya vazirligi xabar berdi.
Xabarga ko‘ra, do‘konda xaridor sotib olgan mahsuloti uchun 20 000 so‘mlik chek urish o‘rniga anglashilmovchilik bo‘lib 2 milliard so‘mlik chek urib yuborilgan. Buning natijasida esa sotuvchiga millionlab soliq kelib chiqqan.
Tadbirkor katta miqdordagi ortiqcha soliq qarzdorligi sabab chekni bekor qilish uchun soliq boshqarmasiga murojaat qilgan, biroq unga ma’lumotlarni tahrirlab bo‘lmasligini ma’lum qilingan va muammo hal qilinmagan.
Xatirchi tuman adliya bo‘limi tomonidan Navoiy viloyat soliq boshqarmasining 2025 yil 17 aprel kunidagi tegishli chekni tahrirlamaslik xatti-harakatini qonunga xilof deb topish yuzasidan Navoiy tumanlararo ma’muriy sudga shikoyat kiritilgan.
Sud tadbirkor foydasiga qaror qabul qilgan.
