O‘zbekistonda 2025 yilning yanvar–sentabr oylarida soliq huquqbuzarliklari haqida xabar bergan fuqarolarga jami 24,1 milliard so‘m mukofot to‘landi. Bu haqda Soliq qo‘mitasi xabar berdi.
Yil boshidan "Soliq" mobil ilovasining "Soliq hamkor" tizimi orqali 82 857 ta murojaat kelib tushgan. Shundan 74 970 tasi – xarid cheki bermaslik, 3 001 tasi – to‘lovni plastik karta orqali qabul qilmaslik, 184 tasi – karta uchun xarid summasini oshirish, 4 702 tasi esa boshqa turdagi huquqbuzarlik holatlariga oid bo‘lgan.
Ko‘rib chiqilgan murojaatlar asosida 34 196 ta sayyor soliq tekshiruvi o‘tkazilib, ularning 98,8 foizida huquqbuzarlik aniqlangan. Natijada xabar bergan fuqarolarga 34 139 ta holat bo‘yicha undirilgan jarimalarning 20 foizi – 24,1 milliard so‘m mukofot sifatida to‘langan.
Eng ko‘p mukofot Toshkent shahri aholisi (6 mlrd 20 mln so‘m), eng kami esa Jizzax viloyati fuqarolari (733,5 mln so‘m) ulushiga to‘g‘ri keldi.
Ma’lumot uchun, soliq huquqbuzarliklari haqida xabar berganlarni pul bilan rag‘batlantirish tizimi O‘zbekistonda 2022 yil boshidan joriy etilgan.
