Bugun, 29 sentyabr kuni Toshkent shahar Uchtepa tumani jinoyat sudida diniy blogger va “Azon Global” portali asoschisi Mubashshir Ahmad (asl ismi Alisher Tursunov)ning navbatdagi sud majlisi bo‘lib o‘tishi kerak edi. Biroq, bu majlis yana boshqa kunga – 2 oktyabr, soat 16:00 ga qoldirildi. Bu haqda “Azon Global” portali xabar berdi.
Sud majlisining nima uchun qoldirilgani yuzasidan rasmiy izoh berilmaganicha yo‘q. Bu esa sud jarayonining navbatdagi kechiktirilishi bo‘lib, Tursunovning ishi bo‘yicha bunday holat birinchi marta kuzatilmayapti.
Ma’lumot uchun, unga Jinoyat kodeksining 244-1-moddasi (jamoat xavfsizligiga tahdid soluvchi materiallar bilan ishlash) va 244-3-moddasi (diniy materiallarni qonunga xilof tarzda tarqatish) bo‘yicha ayblovlar qo‘yilgan va u qamoqqa olingan.
Avvalroq, 18 sentyabr kuni bo‘lib o‘tgan sud majlisida davlat ayblovchisi Mubashshir Ahmadga 7 yil ozodlikdan mahrum etish jazosini so‘ragan edi. Sud jarayonlari davom etmoqda.
