“Tolibon” harakati rahbari Haybatulloh Oxundzoda “axloqsizlikning oldini olish” maqsadida Afgʻonistonning Balx viloyatida optik tolali internet xizmatlarini taqiqlash toʻgʻrisida qaror chiqardi. Bu haqda Zamon.uz xabar bermoqda.
Qayd etilishicha, cheklovlar oqibatida Balxdagi davlat idoralari, xususiy sektor va turar-joylar Wi-Fi tarmogʻidan uzilgan. Hozirda hududda faqat mobil aloqa tarmoqlari orqali internetdan foydalanish mumkin.
Viloyat vakili ehtiyojlarni qondirish uchun muqobil tarmoq tashkil etilishi rejalashtirilayotganini bildirgan. Biroq cheklovlarning boshqa viloyatlarga ham joriy etilishi masalasiga aniqlik kiritilmagan.
Shu bilan birga, Londonda joylashgan Afgʻoniston xalqaro nashri maʼlumotiga koʻra, Balxdan tashqari Qandahor, Uruzgon, Hilmand va Nimroz viloyatlarida ham internet xizmatlari uzilgan.
