Sirdaryo viloyati Yangiyer shahar Soliq inspektsiyasi rahbari tadbirkor ayolga shilqimlik qilgani uchun ishdan olindi. Bu haqda Abdurahmon Tashanov o‘zining Facebook sahifasida ma’lum qildi.
Bildirilishicha, Soliq inspektsiyasi rahbari A.B. eri musofirda bo‘lgan tadbirkor ayolga nisbatan shilqimlik mazmunidagi SMS xabarlar yozib, oylar davomida bezovta qilgan.
Sobiq mansabdor ayolning do‘koniga bir necha marta inspektorlarni yuborib, undan tashvishlanayotgani hamda kechqurun choy bahonasida gaplashib olishi mumkinligini yozgan. Ayol esa bu gaplardan hadiksirab, biroz muddat do‘koniga bormay yurgan.
Shundan so‘ng ayolning murojaatlari asosida ish tegishli organlar tomonidan o‘rganib chiqilgan va xodim bilan mehnat shartnomasi bekor qilingan.
To‘plangan hujjatlar esa viloyat prokuraturasiga, undan Yangiyer shahar sudiga yuborilib, Ma’muriy javobgarlik to‘g‘risidagi kodeksning mayda bezorilikni nazarda tutuvchi moddasi bilan ish qo‘zg‘atilgan.
