“The New York Times” yozishicha, Afg‘onistonda yuz bergan zilzila oqibatida vayronalar ostida qolgan yoki jarohat olgan ko‘plab ayollarga yordam berilmagan.
Bunga sabab sifatida “Tolibon” qat’iy rioya qiladigan madaniy qoidalar — ayollar va begonalar o‘rtasidagi jismoniy aloqaning taqiqlanishi ko‘rsatildi.
Guvohlarning aytishicha, qutqaruvchilar erkaklar va bolalarga yordam ko‘rsatgan, biroq ayollarni chiqarmagan. Natijada, jarohatlangan yoki qon yo‘qotayotgan ayrim ayollar boshqa qishloqlardan ayollar yetib kelishini kutishga majbur bo‘lgan va hayotdan ko‘z yumgan.
“Tolibon” boshqaruvidagi Sog‘liqni saqlash vazirligi matbuot kotibi Sharafat Zaman ham ayol tibbiyot xodimlari yetishmasligini tan olgan, ammo Kunar, Nangarhor va Lagman viloyatlarida ayol shifokor va hamshiralar yordam ko‘rsatayotganini ma’lum qilgan.
Ma’lumot uchun, 1-sentabrgacha o‘tar kecha Afg‘onistonda 6,0 magnitudali zilzila qayd etildi. Keyinroq 5,2 va 4,7 magnitudali takroriy silkilishlar ham yuz berdi. Hodisa oqibatida 2,2 mingdan ortiq odam halok bo‘lgan, 3,6 mingdan ziyodi jarohat olgan.
