Kiyevda Ukrainaning “Neptun” raketalari haqida ma’lumot olishga uringan Xitoy josuslari ushlandi. Bu haqda Ground News xabar berdi.
Ma’lum qilinishicha, Kiyevda ikki nafar Xitoy fuqarosi – Kiyevdagi oliy o‘quv yurtlaridan birining sobiq talabasi va uning otasi qo‘lga olingan. Idora ma’lumotlariga ko‘ra, ushbu shaxslar Xitoy xavfsizlik organlariga Ukrainaning RK-360MTS “Neptun” raketa majmuasiga oid maxfiy hujjatlarni yetkazishga harakat qilishgan.
"Sobiq talaba maxfiy hujjatlarni qo‘lga kiritish uchun mudofaa kuchlarining eng zamonaviy qurollarini ishlab chiqish bilan shug‘ullanadigan Ukraina fuqarosini yollashga uringan. U hujjatlarni olayotgan paytda ushlangan. Uning otasi esa 7 iyul kuni mamlakat hududiga kirib kelgan va ertasi kuni Xitoyning Kiyevdagi elchixonasiga borgan. U ham josuslikda gumon qilinmoqda", deyiladi Ukraina Xavfsizlik xizmati bayonotida.
