“Yuksalish” umummilliy harakati jamoatchilik nazorati asosida o‘tkazgan so‘nggi monitoring natijalarida ayrim viloyat va tumanlarda amalga oshirilgan deb e’lon qilingan suv ta’minoti loyihalari amalda to‘liq ishlamayotgani qayd etildi.
Monitoringga ko‘ra:
Qashqadaryo viloyatining Dehqonobod tumanida suv quvuri qurilgan bo‘lsa-da, aholi unga ulanmagan.
Qarshi va G‘uzor shaharlarida suv tarmoqlari mavjud bo‘lsa-da, ular orqali real suv ta’minoti amalga oshirilmayapti.
Andijon viloyatining Asaka tumanida esa aholiga suv haftasiga bor-yo‘g‘i ikki kun yetkazib berilyapti.
Bu holatlar jamoatchilikning noroziligiga sabab bo‘layotgani, ayrim joylarda rasmiy ma’lumotlar bilan aholi fikri o‘rtasida jiddiy farqlar borligiga ishora qilmoqda.
“O‘zsuvta’minot” AJ esa “Yuksalish” harakatining xulosalarini rad etib, ularni noto‘g‘ri axborot tarqatishda, xolis bo‘lmaslik va mutaxassislar ishtirokisiz monitoring o‘tkazishda aybladi.
Bunga javoban, “Yuksalish” harakati barcha ma’lumotlar joylardagi aholi va rasmiy manbalardan olinganini, kuzatuvlar aniq manzil va sanalar bilan hujjatlashtirilganini ma’lum qildi. Harakat vakillari ta’kidlashicha, ushbu monitoring aholidagi norozilik kayfiyati, ochiq-oshkoralik va jamoatchilik ishtirokini ta’minlash maqsadida amalga oshirilgan.
Mutaxassislar esa bu kabi ziddiyatli holatlar ijtimoiy infratuzilma loyihalarining samaradorligini oshirishda jamoatchilik nazoratini kuchaytirish zarurligini ko‘rsatmoqda.
