Avvalroq, endilikda Vazirlar Mahkamasining tegishli qarori bilan jinsini o‘zgartirgan fuqarolar ism-familiyasini ham o‘zgartirishi mumkinligi xabar qilingandi. Shuningdek, ijtimoiy tarmoqlarda “jinsini o‘zgartirishga ruxsat berildi...”, “endi kim jinsini o‘zgartirsa, u familiya, ism va ota ismini ham o‘zgartirishi mumkin...” mazmunidagi xabarlar tarqaldi. Adliya vazirligi mazkur xabarlar va qaror yuzasidan tushuntirish berdi.
Qayd etilishicha, qonunchilikka muvofiq bolaning tug‘ilishini qayd etish vaqtida uning jinsiga oid ma’lumotlar tibbiyot muassasasi tomonidan beriladigan tibbiy guvohnoma asosida yoziladi. Biroq har yili o‘rtacha 5-6 nafar bola jinsi noaniq holatda tug‘ilishi uchrab turadi, bunda dastlabki tekshiruvlar bolaning jinsini “o‘g‘il” yoki “qiz” deb ko‘rsatsa-da, keyinchalik bola 5-10 yosh, ayrim holatlarda esa 10-16 yoshdan oshganda bolaning jinsi “o‘g‘il” emas “qiz” ekani yoki aksincha “qiz” emas “o‘g‘il” ekani aniqlanmoqda.
Shu kabi holatlarda tibbiyot muassasasining xulosasi bilan jinsga oid ma’lumotlarga tuzatish kiritiladi.
Ma’lumot uchun, bu kabi holatlarda jinsini tuzatish mumkinligi Oila kodeksining 229-moddasida belgilangan bo‘lib, mazkur huquqiy normalar yangi joriy etilmagan, aksincha 1998 yil 1 sentyabrdan buyon amalda hisoblanadi.
Bu borada qonunchilik hujjatlarida ayrim huquqiy bo‘shliqlar mavjud bo‘lgan. Misol tariqasida, 2008 yilda tug‘ilgan bolaning jinsini aniqlash imkoni bo‘lmasdan “o‘g‘il” deb yozilgan va o‘g‘il bolaning ismi qo‘yilgan. Keyinchalik bola 16 yoshga to‘lgach tibbiy tekshiruvlarda uning jinsi qiz ekani aniqlanib, tibbiyot muassasasining xulosasiga asosan jinsiga oid ma’lumotlarga tuzatish kiritilgan. Biroq ushbu xulosa asosida uning familiya, ism va ota ismini qiz bolalarga mos ravishda o‘zgartirish imkoni bo‘lmagan.
Mazkur huquqiy bo‘shliqlarni bartaraf etish maqsadida Vazirlar Mahkamasining joriy yil 12 iyundagi 362-son qarori qabul qilinib, tibbiyot muassasasining xulosasiga asosan jinsiga oid ma’lumotlar tuzatilganda bolaning familiya, ism va ota ismini jinsiga mos ravishda o‘zgartirishi belgilangan.
“Ommaviy axborot vositalaridan bunday holatlarning noto‘g‘ri talqin qilinmasligini so‘rab qolamiz”, deyiladi xabarda.
