“Greenpeace” harakati faollari Parijdagi “Greven” muzeyiga ishchi kiyimida kirib, Fransiya prezidenti Emmanuel Makronning mum haykalini o‘g‘irlab chiqishdi.
Ular haykalni adyolga o‘rab, xizmat eshigi orqali olib chiqishgan. Ma’lumotlarga ko‘ra, skulptura qiymati 40 ming yevroga teng.
Bu g‘ayrioddiy aksiyaning asosiy maqsadi — Rossiyadan gaz, atom elektr stansiyalari uchun yoqilg‘i va o‘g‘it sotib olishga qarshi norozilik bildirish bo‘ldi.
Haykalni ko‘tarib olgan 10 ga yaqin faol Rossiya bayrog‘i fonida Parijdagi Rossiya elchixonasi oldida miting o‘tkazdi.
Ularning bannerida quyidagi so‘zlar bitilgan edi: “Ukraina yonmoqda, biznes esa davom etmoqda”.
“Greenpeace” bu orqali Fransiyaning urush davom etayotgan bir vaqtda Rossiya bilan iqtisodiy aloqalarni saqlab qolayotgani va bu bilan Kremlga bilvosita moliyaviy ko‘mak ko‘rsatayotganini ochiq tanqid qildi.
