Rim-katolik cherkovining yangi rahbari Rim papasi Lev XIV G‘azo sektoridagi gumanitar vaziyatdan chuqur xavotir bildirib, hujumlarni zudlik bilan to‘xtatish va mintaqaga insonparvarlik yordami yetkazilishiga ruxsat berish zarurligini ta’kidladi.
8-may kuni saylangandan keyin o‘zining birinchi umumiy tinglovida nutq so‘zlagan Rim papasi Avliyo Pyotr maydonidan kelgan dindorlarga murojaat qildi.
"G‘azodagi vaziyat tobora xavotirli va og‘riqli bo‘lib bormoqda. Men yana bir bor bolalar, qariyalar va bemorlar to‘layotgan bu yurakni ezuvchi holatga chek qo‘yish uchun gumanitar yordamning to‘siqsiz yetib borishini ta’minlash va harbiy harakatlarni to‘xtatishga chin dildan chaqiraman," deydi pontifik.
Rim papasi ham barcha dindorlarni har kuni tinchlik va "qalblarni qurolsizlantirish" uchun ibodat qilishga chaqirgan.
Isroil armiyasi bloklangan G‘azo sektoriga 18 mart kuni ertalab, 19 yanvardan kuchga kirgan o‘t ochishni to‘xtatish muddati tugaganidan keyin shiddatli hujumlarni qayta boshladi.
Hujumlar qayta boshlanganidan beri 3 427 falastinlik, asosan qariyalar, ayollar va bolalar halok bo‘ldi, yana 9 647 kishi yaralandi.
2023 yil 7 oktyabrda Isroilning G‘azo sektoriga ommaviy hujumlari boshlanganidan beri halok bo‘lgan falastinliklar soni 53 573 nafarga, yaralanganlar soni esa 121 688 nafarga yetdi.
