Fransiya prezidenti Emmanuel Makronning aytishicha, agar Rossiya Ukrainada 30 kunlik sulhga rozi bo‘lmasa, Yevropa Ittifoqi AQSh bilan kelishilgan holda unga qarshi yangi sanksiyalarni joriy etishi mumkin. Bu haqda u TF1 telekanaliga bergan intervyusida ma’lum qildi.
Makron sulh zarurligini ta’kidlab, bu orqali “hududiy masalalarni hal qilishga yordam beradigan muzokaralar”ni boshlash mumkinligini qayd etdi.
Shu bilan birga, u “hatto ukrainaliklarning o‘zi ham 2014-yildan buyon yo‘qotilgan barcha hududlarni qaytarib olish mumkin emasligini tushunib turishadi”, — deydi.
Fransiya prezidentiga ko‘ra, tinchlik bitimi imzolanganidan so‘ng, BMT tinchlikparvar kuchlari yoki xavfsizlikni ta’minlovchi missiyalarni joylashtirish masalasi ko‘tarilishi mumkin. Ularning vazifasi — “front chizig‘idan uzoq hududlarda joylashib, Rossiyani mojaroni davom ettirishdan tiyib turish” bo‘lishi kerak.
Shuningdek, Makron asosiy xavfsizlik kafolati sifatida “kuchli ukrain armiyasi” bo‘lishi lozimligini alohida ta’kidlagan.
