Toshkentning Shayxontohur tumanida pichoq bilan odamlarga tahdid qilgan fuqaro javobgarlikka tortildi. Bu haqda Toshkent shahar IIBB axborot xizmati xabar berdi.
Ijtimoiy tarmoqlarda bir erkakning liftda yosh bolaga qo‘l ko‘targani, ko‘chada fuqarolarga pichoq bilan tahdid qilgani tasvirlangan videolar tarqaldi.
IIBB ma’lumotlariga ko‘ra, 18 aprel kuni soat 19:40 larda Shayxontohur tumani Sebzor ko‘chasida joylashgan avtoturargohlardan birida o‘rnatilgan «tashvish tugmasi» bosilgani haqida Toshkent shahar IIBB Qo‘riqlash boshqarmasiga xabar kelib tushgan.
Zudlik bilan voqea joyiga yetib borgan IIO xodimlari tomonidan aniqlanishicha, 1958 yilda tug‘ilgan X.S. mast holatda bo‘la turib, avtoturargoh qorovuli va boshqa fuqarolarni oshxona pichog‘i bilan qo‘rqitib, jamoat tartibini buzgan. So‘ng voqea joyidan qochib, ko‘p qavatli uylardan biriga kirib ketgan. Ko‘rilgan tezkor chora-tadbirlar natijasida fuqaro X.S. ushlanib, IIBga olib borilgan.
X.S. tomonidan pichoq bilan hech kimga tan jarohati yetkazilmagan.
Holat yuzasidan X.S.ga nisbatan Ma’muriy javobgarlik to‘g‘risidagi kodeksning 183- (mayda bezorilik), 194- (ichki ishlar organlari xodimining qonuniy talablarini bajarmaslik) va 185-2-moddalari (sovuq qurolni yoki sovuq qurol sifatida foydalanilishi mumkin bo‘lgan ashyolarni olib yurish) bilan ma’muriy bayonnoma rasmiylashtirilgan.
To‘plangan hujjatlar jinoyat ishlari bo‘yicha Shayxontohur tumani sudiga taqdim etilgan. Sud tomonidan ushbu shaxsga nisbatan 10 sutka ma’muriy qamoq jazosi tayinlangan.
