Har qanday sifatsiz dori vositasi inson salomatligi uchun jiddiy xavf tug`dirishi hech kimga sir emas. Hatto bunday mahsulotning nojo`ya ta`siri o`limga sabab bo`lishi mumkin.
Shu tufayli Sog`liqni saqlash vazirligi huzuridagi Farmasevtika tarmog`ini rivojlantirish agentligining Dori vositalari, tibbiy buyumlar va tibbiy texnika ekspertizasi va standartlashtirish markazi tomonidan sifatsiz, kontrafakt, yaroqlilik muddati tugagan farmasevtik mahsulotlarni aniqlash va ekspertizadan o`tkazish bo`yicha qator ishlar amalga oshirilmoqda.
Xususan, o`tgan 2021 yil ushbu markazga kelib murojaatlarga ko`ra, 7490 turdagi 1 578 500 o`ram dori vositalari va tibbiy buyum ekspertizadan o`tkazildi. Natijada:
– 1618 turdagi 72 774 o`ram yorliqlash bo`yicha me`yoriy hujjatlar talablariga mos kelmasligi (kontrafakt);
– 24 turdagi 13 785 o`ram qalbakilashtirilgan dori vositalari (Tebantin, Aktemra, Somnol®, Zardeks, Diprospan®, Ursosan, Serebrolizin®, Reduksin, Spirt, Menovazin, Layboten, Neoton, Tiosetam, L-Lizina Essinat®, Mildronat, Aktovegin, Retabolil Remdesevir (covifor), Aktovegin, Spirt, Layfon, Tropikamid, Tridoks, Zardeks) bir necha marotaba takrorlanganligi;
– 396 turdagi 2794 o`ram dori vositalari va tibbiy buyumlar yaroqlilik muddati tugagani (sifatsiz);
– 2578 turdagi 709 347 o`ram dori vositalari va tibbiy buyumlar davlat ro`yxatidan o`tmaganligi;
– 2874 turdagi 779 800 o`ram dori vositalari va tibbiy buyumlarning muvofiqlik sertifikatlari mavjud emasligi aniqlandi va qonuniy chora ko`rilishi uchun huquqni muhofaza qilish organlariga ma`lumotlar taqdim qilindi.
Eslatib o`tamiz, O`zbekiston Respublikasining “Dori vositalari va farmasevtika faoliyati to`g`risida”gi Qonuni 20-moddasiga muvofiq, cifatsiz, qalbakilashtirilgan, mamlakatimizda ro`yxatdan o`tkazilmagan dori vositalarini va tibbiy buyumlarni, shuningdek ro`yxatdan o`tkazilgan dori vositalarining g`ayriqonuniy nusxalarini xarid qilish, chakana realizasiya qilish va ulardan foydalanish taqiqlanadi.
