Парижда жойлашган ташкилот 2026 йилги глобал индексни эълон қилди. Ҳисоботга кўра, дунёнинг қарийб 75 фоиз мамлакатида сўз эркинлиги муаммоли ёки ўта оғир ҳолатда.
Қароргоҳи Парижда жойлашган “Чегарасиз мухбирлар” (РСФ) 180 давлат қамраб олинган 2026 йилги Матбуот эркинлиги индексини тақдим этди. Унга кўра, Ўзбекистон яна медиа муҳитида жиддий чекловлар сақланиб қолаётган давлатлар қаторида қайд этилди.
Ташкилот дунё бўйича вазият ёмонлашаётганини таъкидлаб, мамлакатларнинг ярмидан кўпи “мураккаб” ёки “жуда жиддий вазият” тоифаларида эканини билдирди. Рейтингнинг юқори поғоналарида анъанавий равишда Норвегия, Дания ва Нидерландия етакчилик қилмоқда. Охирги ўринда эса ОАВ учун энг қаттиқ чекловлар амал қилувчи Эритрея жойлашган.
Постсовет ҳудудида турлича динамика кузатилмоқда: Россия 172-ўринга тушди, Беларус 165-ўринда, Туркманистон 173-поғонада қайд этилди. Айни пайтда Молдова 31-ўринга кўтарилди, Украина 55-ўринга чиқди, Арманистон натижаларини яхшилади, Грузия эса 135-ўринга тушиб кетди.
РСФга кўра, журналистларга босим кучайиши, қонунчилик орқали чекловлар ва ОАВ ходимлари хавфсизлигига таҳдидлар глобал пасайишнинг асосий омиллари бўлиб қолмоқда.
