Бизнес-омбудсман девони томонидан Халқ депутатлари Тошкент шаҳри кенгашининг “Дизайн-код”га оид қарори ўрганилди. Ўрганиш натижасида ҳужжатнинг айрим бандлари амалдаги қонунчиликка зид экани аниқланди.
Маълум қилинишича, “Норматив-ҳуқуқий ҳужжатлар тўғрисида”ги Қонунга мувофиқ, тадбиркорлик фаолиятига таъсир этувчи лойиҳалар Бизнес-омбудсман билан мажбурий тартибда келишилиши керак. Бироқ мазкур қарор ушбу талабга риоя этилмасдан қабул қилинган.
Қарорда реклама воситалари учун белгиланган “паст тўйинган” ва “нейтрал” каби тушунчаларнинг ҳуқуқий мезони аниқ очиб берилмагани қайд этилган. Шунингдек, рангларни бирхиллаштириш талаби интеллектуал мулк ҳуқуқларига, хусусан рўйхатдан ўтган брендларга таъсир кўрсатиши мумкинлиги билдирилган.
Бундан ташқари, янги талабларга мослашиш учун берилган 3 ойлик муддат етарли эмаслиги, жараён босқичма-босқич амалга оширилиши лозимлиги таъкидланган.
Шу муносабат билан Бизнес-омбудсман Тошкент шаҳар кенгашига мазкур қарорнинг тадбиркорликка оид қисмларини қайта кўриб чиқиш, тегишли ўзгартиришлар киритиш ҳамда кучга кириш муддатини узайтириш бўйича таклиф киритган.
