АҚШ президенти Дональд Трамп Вашингтонда дунёдаги энг катта ва энг гўзал ғалаба аркасини қуриш режасини тақдим этди.
Маълум қилинишича, лойиҳа енгил тошдан қурилган арка, олтин элементлар, юқори қисмида иккита металл бургут ва марказда олтин ҳайкални ўз ичига олади. Тегишли тасвирлар ва режалар Truth Social ижтимоий тармоғида эълон қилинган.
Трампнинг таъкидлашича, мазкур иншоот “дунёдаги энг катта ва энг гўзал аркага айланади”.
“Бугун менинг маъмуриятим ҳурматли Санъат комиссиясига дунёдаги энг катта ва энг гўзал ғалаба аркасини қуриш бўйича тақдимот ва режаларни расман тақдим этди”, деб ёзди Дональд Трамп.
Қайд этилишича, лойиҳа Harrison Design томонидан ишлаб чиқилган бўлиб, у амалга оширилса, Вашингтондаги энг баланд иншоотлардан бирига айланиши мумкин.
