Эрон делегацияси АҚШ билан бўладиган музокараларда иштирок этиш учун 10 апрель куни кечқурун Исломободга етиб келди. Бу ҳақда Покистон Ташқи ишлар вазирлигига таяниб “Al Jazeera” хабар берди.
Дастлабки маълумотларга кўра, Покистон пойтахтига Эрон ташқи ишлар вазири Аббос Аракчи ва парламент спикери Муҳаммад Бағир Ғолибоф ташриф буюрган.
АҚШ делегациясига вице-президент Жей Ди Вэнс бошчилик қилади.
Маълум қилинишича, Покистоннинг АҚШдаги элчиси Ризвон Саййид Шоҳ музокаралар осон кечмаганини таъкидлаб, бу жараённи томонларнинг узоқ давом этган дипломатик саъй-ҳаракатлари натижаси сифатида баҳолаган.
Томонлар олдиндан турли позицияларни билдирган: АҚШ санкцияларни юмшатиш ва Ҳормуз бўғозини очишни таклиф қилган бўлса, Эрон бўғоз устидан назоратни сақлаб қолиш ҳамда минтақада ҳарбий ҳаракатларни тўлиқ тўхтатишни талаб қилмоқда.
Шу билан бирга, музокаралар арафасида ҳар икки томон дастлабки келишувлар бузилгани ҳақида бир-бирини айбламоқда.
