Самарқандда декабрь ойида йўқолган 38 ёшли аёлнинг жасади 3 ойдан буён топилмаяпти. бу ҳақда “Миллар” хабар қилди.
Маълум қилинишича, аёлни 30 ёш атрофидаги йигит ўлдирган бўлиши мумкин. Марҳуманинг яқинлари айтишича, у ўша куни уйидан чиқиб кетган ва қайтмаган. У ишдан келиб чой ичган, кейин эса таниш йигит қарз масаласини ҳал қилиш баҳонасида олиб чиқиб кетган. Орадан кўп ўтмай унинг телефони ўчган ва алоқа узилган.
Тахминларга кўра, йигит ва аёл ўртасида келиб чиққан жанжал оқибатида аёлга бир неча бор пичоқ урилган, кейин эса бўғиб ўлдирилган.
Шундан сўнг гумонланувчи жасадни Spark автомашинасида олиб келиб, Дарғом канали ҳудудига ташлаган бўлиши мумкин. Марҳуманинг яқинлари унинг жасади Равотхўжа ҳудуди яқинида бўлиши эҳтимолини билдиришган.
3 ойдан ортиқ вақт ўтганига қарамасдан, жасад топилмади. Маҳаллий аҳоли одатда бундай ҳолатларда 60–70 кун ичида сув юзасига чиқишини айтишган, аммо бу сафар из ҳам топилмади.
Дастлаб қидирув ишлари 27-январгача давом этган, кейин эса тўхтатилган. 2026 йил 25 март куни сув вақтинча тўхтатилиб, яна қидирув олиб борилган, аммо натижа бермаган.
Самарқанд вилояти прокуратураси хабар қилишича, мазкур ҳолат юзасидан Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатилган ва ҳозирда дастлабки тергов ҳаракатлари олиб борилмоқда.
