Ўзбекистонда дори воситалари нархини асоссиз оширган 991 та дорихона аниқланди. Бу ҳақида Рақобат қўмитаси хабар берди.
Маълум қилинишича, дори воситалари учун белгиланган чекланган савдо устамаларини бузиш ҳолатлари Солиқ органлари орқали аниқланиб, “Fair Tech” ягона ахборот тизимига юборилмоқда.
2025–2026 йиллар давомида келиб тушган хабарлар асосида ўтказилган текширувларда 152 та улгуржи ва 839 та чакана дорихонада жами 414 мингдан ортиқ ҳолатда қонунбузилишлар қайд этилган.
Натижада 8,5 млрд сўм миқдорида асоссиз даромад олингани аниқланиб, маблағлар истеъмолчилар фойдасига қайта ҳисоб-китоб қилинган. Шунингдек, уларнинг ҳуқуқларини тиклаш бўйича чоралар кўрилган.
Қўмита маълумотига кўра, лицензия талабларини бузиш ҳолатлари юзасидан тегишли ҳужжатлар Фармацевтика маҳсулотлари хавфсизлиги марказига тақдим этилган.
